2005-2006 udazken-negualdia: 1. elurtza
Aspaldi honetan aro-ikertzaileek ez dute kale egiten. Gogotik egin du elurra ostiraletik behe samarrean. Larunbat goizaldean 300-400 metrotik gora, behintzat, Bilbo inguruko mendietan. Eskuinaldeko argazkia Gasteizen egindakoa da eta benetan, xelebrea! Lehengo egunean blog batean -ez dakit zeinetan- irakurri nuen elurrak pozten gaituelako kontua ez ote den hedabideek bultzaturik edo, agian, american way of lifek eraginda. Ea zergatik poztu behar dugun. Nik neuk txikitatik atsegin izan dut elurra. Gure hirian ez da sarri gertatzen eta hori dela-eta, ikaragarri gustatzen zait. Eta udazken-negualdiko lehenengo elurtza denez gero, eman diezaiegun birpasatxoa Euskal Herriko bazterretan erabiltzen diren izendapenei. Bi dira oinarrizkoak, edur eta elur, eta horietatik aldaera fonetikoak.edur: Bizkaiera. Labayru Hiztegia.
elhur: 1.BN-Baigorri.2.Oihenart.Atsotitzak,136. Elhurra, bere aroan, asegarri.
elhür iz.: BN-Arruta.
elor iz.: N-Beruete.
elur iz.: Behe-Nafarrera / N-Erronkari / Gipuzkera / Zuberera. Ori elurraren ariera! Azkue. Hiztegia.
erur iz.: B-Arratia, Mundaka. Orozko, Txorierri. Azkue. Hiztegia. Urte erurrezkoa, garizkoa. (RS, 150). Erur asko dan urtean, garia; ta erle asko dogunean eztia (RS).
eur iz.: Bizkaiera. Jatsiko dira meza entzutera jaiegunetan, indriska ta eurra bada bere. Moguel. Peru Abarka 59-25 or.
Iruzkinak
Ni larunbat goizean elurretan ibili nintzen, eta argazkitxo batzuk egin nituen. Hori bai, Gasteizko txirrindulariak baino adore gutxiarekin, bai horixe! ;-)
elur iz.: Behe-Nafarrera / N-Erronkari / Gipuzkera / Zuberera. Ori elurraren ariera! Azkue. Hiztegia.
"Ariera" ez du Azkuek berak bere hiztegian biltzen.. ez bide da esistitzen beraz! Gipuzkoako kostaldean asko erabiltzen zen (eta da) "aiera" baina "missing" dago idazle eta kazetarien aho eta lumetatik.
Bere garaian jakin banu Azkueren errefentzia hori, Goierriko zuzentzaile hark ez zidan zentsuratu eta "jarduera" bihurtuko.
Tomax.
Berba polita da, ez dakit zergatik ez den aprobretxatzen euskara batuaren corpus lexikorako.
Gainera ari verbua da anitz emankorra eta versatila kin bere konjugatione osoa. Ikasirik naiz, hor dugu erraz erraz ari naiz, ginen ikasirik gero simpleki ari ginen. Aitzitik tik ihardun dugu sortzen da hori ez hain erraza dihardugu, iraganean geniharduen. Berba batean ni nagoela alde ari eta aski kontra (baina ez absolutuan) ihardun eta bere enparauak. Komenigarriago dela bata askoz gehiago ezi bestea, ari ezi ihardun, eta hori -zergatik ez- darabildala neure euskara propriotik ihardun eta ikasia dudala ari neure kanpoko euskaratik.
Kuskue tanden, Iñaki Iñurrieta
(Alberdania, 2004)
1. Orr.: 149
Arrasto horretan islatzen da, bada, aurreko ariera osoa.
2. Orr.: 176
Zeure ariera guztia koadrikula mugatu horretan konplitzera kondenaturik dago.
3. Orr.: 191
Kaligrafia txukunez kopiatuko zituen, noski, eta ariera horri esker jabetuko zen kopiatzen zituen hitzetan zetzan esanahiaz, zentzuaz, jakituriaz.
Gaur ere ez du hiltzeko eguraldirik egingo, Iñaki Segurola
(Alberdania, 2005)
1. Orr.: 280
Flasha, ezin goragoko sentsazioa, heriotzaren mugetarainoko jolasa, Natura goitarra edo Kimika goitarra bezalako ideien liluramendua eta itsumena, Haiek gabe egon ezina...: gauza askotxok senidetzen ditu mendigoizalea eta drogagoizalea, baina, ongi pentsatuz gero, azken honen jarduna edo ariera askozaz ere garbiagoa da, soilagoa, biluziagoa eta zintzoagoa, mendi-jonkiarena baino.
Ariera bada jarduera eta jarduna ere bai. Tipo bat mekabendioska ari bazen (edo txorakeriak esaten) "hori izango dek gizonaren ariera" esaten genuen eta dugu. Gipuzkoako Beterrian erruz (eurrez) usatzen da.
Baina zuzentzaile-zentsore guztiak ez izaki Xabito bezain eskuzabalak...
Tomax.
Nik, dena dela, zuzentzaile izatekotan, xume-xumea naiz, izan ere testua ezagun batek pasatu zidan (lanean nebilela, hori bai) begiradatxo bat emateko. Berak nik baino askoz hobeto daki euskaraz, eta asmatu zuen berba aukertazeko orduan nire ustez, horregatik ez nion zuzenketarik egin horretan.
Ez nuen ezagutzen. Erabiliko dut.Eta 'airera' horrek gogora ekarri dit geurean asko erabiltzen den hitza: 'aidura'. Bero denean, arbola baten gerizean egiten duen aire goxoari 'aidura' deitzen diogu. Adibidez: 'Aidura ederra egiten du Etnometen'.
Anjel